Вработените во локалната самоуправа на Карпош заедно со градоначалникот Стевчо Јакимовски, насадија 100 садници во околината на наслебата Карпош 3, а потоа реализираа и редовно есенско чистење.
- По повод денот на општината, одлучивме да посадиме дрвја на територија на Карпош 3. Токму тука садиме 100 садници заедно со вработените на општина Карпош кои ја чистат општината заедно со членовите на Советот. Претходно насадивме 50 дрвја во населбата Тафталиџе 2.300 дрвја во Карпош 4, илјада покрај булеварот Митрополит Теодосиј Гологанов. На ред сега е паркот кој се прави наспроти студентскиот дом „Гоце Делчев“, кадешто ќе бидат засадени околу 200 дрвја - вели Јакимовски.
Според него, годинава се засадени околу 1.500 дрвја и ако на тоа се надоврзе Денот на дрвото кога се планира засадување на уште 5.000 по булеварите, парковите, домовите, училиштата и градинките, Карпош дополнително ќе зазелени.
- Оваа година ќе ја завршиме со некаде околу седум илјади дрвја насадени на територија на општина Карпош. Целта е зачувување на човековата средина имајќи предвид дека општина Карпош е општина која најголем дел сама го одржува зеленилото и хигиената - додава Јакимовски.
