Училиштата и градинките до 15 јануари 2017 година може да аплицираат за добивање зелено знаме, сребрено и бронзено ниво во рамки на програмата „Интеграција на еколошката едукација во македонскиот образовен систем“.
Програмата ја спроведува Здружението за едукација, комуникација и консалтинг ОХО, а се имплементира преку канцеларијата во Министерството за образование и наука на Македонија, согласно потпишаниот Меморандум за соработка со Швајцарската агенција за развој и соработка.
Главна придобивка од Програмата е можноста за создавање мрежа на еко-училишта и еко-градинки кои ја усвоиле заштитата на животната средина како една од основните вредности во својот развој и управување.
Со членство во мрежата, еко-училиштата и еко-градинките добиваат можност за учество во национални и интернационални натпревари, можност за аплицирање со проекти, можност за добивање финансиска поддршка, поврзување со училишта и градинки од регионот и пошироко и многу други поволности.
