Фабриката на „Кранфилд Фаундри“ во индустриската зона Неокази во Пробиштип се гради согласно сите еколошки стандарди и според законската регулатива на Македонија и на Европската унија, истакна заменик-министерката за животна средина и просторно планирање Соња Лепиткова, на денешното поставување на камен-темелникот на овој индустриски капацитет.
Во изминатиов период, екологисти и граѓани изразуваа загриженост дека леарницата штетно ќе влијае врз животната средина во градот и во околината, и ќе го наруши здравјето на луѓето. Кон овие тврдења се придружи и партијата ДОМ. По овие предупредувања, деновиве локалните власти во Пробиштип поставија две мерни станици за квалитетот на воздухот.
На почетокот на изградбата присуствуваа и премиерот Емил Димитриев и повеќе високи државни, локални и партиски функционери.
- Во новата индустриска зона Неокази во Пробиштип инвестираме два милиони евра од кои 1,5 милиони за донесување електрична енергија до самата зона, а 300 илјади евра за изградба на комплетна инфраструктура, бидејќи во оваа зона планираме да донесеме и други инвеститори кои ќе градат нови фабрики - рече премиерот Димитриев.
Инвестицијата е вредна 15 милиони евра, и се предвидува вработување на околу 280 лица. Фабриката се очекува да биде изградена за помалку од една година.
BLOG COMMENTS POWERED BY DISQUS