Со двете последни жртви од удари од гром во САД, вкупниот број загинати на овој начин годинава се искачи на 29, што е рекорд од 2010 година наваму, соопшти Националната метеоролошка служба.
Последните два инцидента се случија во државите Колорадо и Мичиген. Со тоа веќе се надмина вкупниотброј од минатата година од 27 загинати, иако до крајот на годинава има уште пет месеци. Најголем број од смртоносните удари се случиле во јули (12) и во август (8).
Бројот на смртни случаи е сепак многу помал од 1940-тите и 1950-тите, кога стотици луѓе годишно гинеле од громови, но тоа е бидејќи тогаш имало многу повеќе фармери на отворено во полињата. Статистички, според метеоролошката служба, шансите некој да биде удрен од гром кога било во животот се 1:12.000. Исто така, во просек на десетмина погодени има по еден загинат од ударот. Но Џон Џенсениус, експерт од оваа област во Националната метеоролошка служба, повикува луѓето да бидат внимателни и да не остануваат надвор кога има грмотевици.
- Ако сте доволно блиску да ги слушнете, доволно сте блиску и да бидете удрени - вели Џенсениус.
