Пожари кај Неготино и кај Богданци

Командирот на територијалната противпожарна единица од Неготино, Иле Илиев информира дека се обидуваат да го локализираат пожарот кој има зафатено околу 30 хектари трева,  како и лозови насади. Како што посочи тој, огнот се движи и кон Гоцева шумадици.

Во гаснењето учествуваат три возила и седум пожарникари, а на помош е и едно возило и неколку вработени од подружницата на „Македонски шуми“ од Демир Капија. Најавена е и дополнителна помош.

И во околината на Богданци во близина на приватните оранжерии кои се наоѓаат покрај реката Луда Мара попладнево изби пожар на отворено кој за брзо време се прошири на околниот терен обраснат со сува трева и нискостеблести растенија. Веднаш по дојавата за пожарот на терен излезе екипата на ППЕ на Гевгелија која огнот го гасне со две возила и 12 пожарникари.

Поради ветрот кој дува огнот брзо се шири кон планината Карабалија и се заканува да го зафати нејзиниот шумски предел. Гевгелиските пожарникари побараа помош од своите колеги од Струмица и Валандово.