Покривот на пазарот во хрватскиот град Вараждин е претворен во соларна централа.
Поставени се соларни панели со кои ќе се добива електрична енергија за потребите на пазарот, а вишокот ќе се продава на хрватското електростопанство.
- Денес конечно ја пуштаме централата во погон. Сигурен сум дека таа во голема мерка ќе помогне да се добие додадена вредност за нашиот пазар - рекол Предраг Циглар, директор на градскиот пазар во Вараждин.
Соларната централа има површина од околу 1.500 квадратни метри и јачина од 147 киловати. Проектот чинел 187 илјади евра, од кои 147 биле за соларните панели, а другите за изградба на покривната конструкција на пазарот, која морало целосно да биде заменета. Од почетокот на изградбата до пуштањето во употреба не поминала ниту цела година.
- Сега навистина станавме зелен пазар. Освен што нудиме домашни зелени производи, имаме и енергија од обновливи извори - заклучил Циглар.
