Соларна електрана од еден гигават ќе биде инсталирана во Карапинар, Турција.
Таа ќе биде изградена од страна на конзорциумот Кајлон-Ханвах кој на тендерот понудил најниска цена од 0,0699 евра за киловатчас. Вкупната вредност на проектот е 1,3 милијарди долари.
Карапинар ќе биде изградена во специјализирана индустриска зона која е во сопственост на Министерството за енергија и природни ресурси.
Според тендерот обврска на инвеститорот е да користи домашна работна сила и опрема која мора да биде произведена локално. Тендерот наложува соларната електрана да биде изградена во рок од 21 месец од моментот кога е потпишан договорот, а се очекува производство на електрична енергија да започне во рок од 36 месеци од моментот кога ќе се заврши со поставувањето на панелите.
Друг услов од тендерот е дека во одделот за истражување и развој треба да се вработат 100 луѓе, како технички персонал, од кои локалните инженери ќе бидат 80 отсто од сите вработени на овој проект и дека во овој оддел мора да бидат активни најмалку следните 10 години. Електричната енергија произведена во оваа соларна централа ќе се продава на гарантираната цена за следните 15 години.
