Русија во текот на 2016 година покрила приближно една третина од потребите на гас во Европа, што е досега незабележано ниво достигнато и покрај тензиите со ЕУ, информираа од „Газпром“.
- Постепено се зголемува делот на испорачан гас од „Газпром“ во Европа, и тој годинава достигна речиси една третина од европските потреби - напиша рускиот енергетски гигант во последното издание на своето списание „Блу фјуел“.
Раководството на компанијата својот пазарен удел во Европа во текот на 2015 година го процени на 31 процент, што уште тогаш беше рекорд.
Со месеци наназад „Газпром“ ги истакнува своите добри резултати како доказ дека ЕУ не може без рускиот гас, и покрај тоа што Брисел и некои земји членки во последните години се противат на проектите за нови руски гасоводи.
Европската комисија ја сомничи руската државна компанија за злоупотреби со доминантната позиција и за поскапо продавање на гасот на осум држави членки од Источна Европа.
