Инспекциските служби на општина Гевгелија почнаа акција за откривање и отстранување на непрописно поставените олуци за собирање на атмосферска вода од објектите на физички и правни лица кои спротивно од законот се приклучени во системот на фекалната канализациска мрежа.
- Со Законот за снабдување со вода за пиење и одведување на урбани води, строго е забрането испуштањето на атмосферската вода во канализацискиот систем за отпадна вода од домаќинствата и индустриска отпадна вода, затоа што во случај на пороен дожд несоодветниот дотур на атмосферската вода предизвикува сериозни проблеми со излевањето на отпадната вода од канализацискиот систем - велат инспекторите и нагласуваат дека приклучување на олуци со атмосферска вода е дозволено само на улиците во градот каде што постои атмосферска канализација.
Инспекторите истовремено упатуваат апел до сите физички и правни лица на време да ги отстранат неправилно приклучените олуци во фекалната канализација затоа што во спротивно, по нивното откривање, ќе се преземаат законски пропишани санкции против прекршителите, кои предвидуваат и парична казна од 300 евра во денарска противвредност.
