Балкански рис на ѕидот на државна зграда во Елбасан

Станува збор за седиштето на регионалната управа за заштитени подрачја. Насликан е еден од рисовите што бил фотографиран со фотозамка во албанскиот национален парк Шебеник-Јабланица во 2012 година, поставена од истражувачкиот тим на Здружението за заштита и зачувување на природната средина во Албанија (ППНЕА).

Ова е уште еден потег со кој активистите за заштита се обидуваат да ја подигнат јавната свест за напорите за зачувување на балканскиот рис, од кој се проценува дека во дивината останале само триесетина возрасни единки, кои живеат главно на пограничните планински венци во југозападниот дел на Балканот. Редовно се организираат и училишни активности во кои децата го цртаат балканскиот рис, и во Албанија и во Македонија.