Општина Пробиштип годинава очекува средства од продажбата на парцелите за изградба на викенд куќи и хотели на планината Пониква и во селото Лесново каде што се наоѓа познатиот Лесновски манастир.
Според градоначалникот Тони Тоневски, на почетокот на годинава Општинскиот совет треба да го донесе новиот Детален урбанистички план (ДУП) за Пониква, на површина од 40 хектари.
- Со овој ДУП ќе бидат обезбедени нови локации за викенд куќи, но ќе има и локации за деловни простории, одмаралишта, ресторани, хотели и други објекти за кои има потреба еден ваков туристички локалитет. Исто така и во Лесново работиме на детален урбанистички план на површина од околу 50 хектари. И таму има објекти што ќе бидат за викенд куќи, за развој на туризмот, како и една маркица за изградба на хотел - истакна Тоневски.
За подобра промоција на туристичките капацитети и локации на територијата на Општина Пробиштип е изработен Туристички водич, кој, како што нагласи градоначалникот, е стратегиски документ. Годинава интензивно ќе се работи на промоција на туризмот за да се привлечат гости од земјава и од странство.
- Општина Пробиштип има голем потенцијал за развој на туризмот и со Пониква и со Лесново и со други прекрасни и живописни делови на Осоговската планина, Раткова скала, Кундиско езеро,... Се што имаме на територија на Општината можеме да го промовираме преку Туристичкиот водич, но многу е важно да се прави планска документација за инфраструктурата за стимулирање на развојот на туризмот - нагласува Тоневски.
